Psalms 102

Ihooya rĩa Mũndũ Mũnyamarĩku

1 ^aWee Jehova, igua ihooya rĩakwa;
reke gũkaya gwakwa ngĩhooya ũteithio gũgũkinyĩre.
2Tiga kũũhitha ũthiũ waku
rĩrĩa ndĩ mĩnyamaro-inĩ.
Inamĩrĩria gũtũ gwaku ũnjigue;
ndagũkaĩra, njĩtĩka o narua.

3 ^bNĩgũkorwo matukũ makwa marathira
o ta ũrĩa ndogo ĩthiraga;
namo mahĩndĩ makwa maraakana o ta gĩcinga.
4 ^cNgoro yakwa ĩringĩkĩte na ĩkahooha o ta nyeki;
ndiganĩirwo o na nĩ kũrĩa irio.
5Tondũ wa ũrĩa ndĩracaaya nyanĩrĩire,
hĩnjĩte ngatigara o gĩkonde na mahĩndĩ.
6 ^dHaana ta ndundu ya werũ-inĩ,
ngahaana ta ndundu ĩrĩa ĩikaraga kũrĩa kwanangĩku.
7 ^eNdaaraga itarĩ toro;
haanĩte ta nyoni ĩrĩ o iiki nyũmba igũrũ.
8 ^fMũthenya wothe thũ ciakwa itindaga igĩĩthirĩkia;
acio maanyũrũragia mahũthagĩra rĩĩtwa rĩakwa taarĩ kĩrumi.
9 ^gNĩgũkorwo ndĩĩaga mũhu taarĩ irio ciakwa,
na kĩrĩa nyuuaga ngagĩtukania na maithori,
10tondũ wa mangʼũrĩ maku manene,
ũnjoete na igũrũ ũkanjikia mwena-inĩ.
11 ^hMatukũ makwa mahaana o ta kĩĩruru kĩa hwaĩ-inĩ;
hoohaga ta nyeki.

12 ⁱNo rĩrĩ, Wee Jehova ũgũtũũra ũikarĩire gĩtĩ kĩa ũnene nginya tene na tene;
ngumo yaku ĩgũtũũra njiarwa na njiarwa.
13 ^jWee nĩũkwarahũka ũiguĩre itũũra rĩa Zayuni tha,
nĩgũkorwo ihinda rĩa kũrĩĩka wega nĩ ikinyu;
ihinda rĩrĩa rĩathĩrĩre nĩ ikinyu.
14Nĩgũkorwo mahiga makuo nĩmakenagĩrwo nĩ ndungata ciaku;
o na rũkũngũ rwakuo nĩrũtũmaga iringwo nĩ tha.
15 ^kNdũrĩrĩ nĩigeetigĩra rĩĩtwa rĩa Jehova,
athamaki othe a thĩ mekĩrĩre riiri waku.
16 ^lNĩgũkorwo Jehova nĩagaaka itũũra rĩa Zayuni rĩngĩ,
na eyumĩrie arĩ na riiri wake.
17Nĩakaigua mahooya ma andũ arĩa aagi;
ndakanyarara mahooya mao.

18 ^mŨhoro ũyũ nĩwandĩkwo nĩ ũndũ wa rũciaro rũrĩa rũgooka,
nĩguo andũ arĩa mataciarĩtwo makaagooca Jehova:
19“Jehova nĩacũthĩrĩirie thĩ arĩ harĩa hake haamũre kũu igũrũ;
arĩ kũu igũrũ Jehova nĩkũrora aarorire thĩ,
20nĩguo aigue gũcaaya kwa arĩa moheetwo,
na ohorithie arĩa maatuĩrĩirwo gũkua.”
21 ⁿNĩ ũndũ ũcio rĩĩtwa rĩa Jehova nĩrĩkoimbũrwo kũu Zayuni,
na nĩakagoocwo kũu Jerusalemu
22rĩrĩa andũ a ndũrĩrĩ na mothamaki
makoongana, mathathaiye Jehova.

23Hĩndĩ ya mũtũũrĩre wakwa nĩanyiihirie hinya wakwa;
nĩakuhĩhirie matukũ makwa.
24 ^oNĩ ũndũ ũcio ngĩkiuga atĩrĩ:
“Wee Ngai wakwa, ndũkanjũrage o rĩrĩa ndaiganĩria matukũ makwa;
wee-rĩ, mĩaka yaku ĩthiiaga o na mbere nginya njiarwa na njiarwa.
25 ^pO kĩambĩrĩria-inĩ, nĩwaarire mĩthingi ya thĩ,
o narĩo igũrũ nĩ wĩra wa moko maku.
26 ^qIcio nĩgũthira igaathira, no wee nĩgũtũũra ũgaatũũra;
igaakũra o ta nguo, ithire.
Ũgaacigarũrĩra ta nguo,
icooke iteeo.
27No Wee ndũgarũrũkaga,
nayo mĩaka yaku ndĩrĩ mũthia.
28 ^rCiana cia ndungata ciaku igaatũũra na thayũ mbere yaku;
nacio njiaro ciacio cigaikara irũmĩte irĩ mbere yaku.”